Risposta alla contribuziun da Aluis Maissen « Ina risposta necessaria » cumparida ella LQ dils 3 da matg 2010
La contribuziun ella Quotidiana dils 3 da matg da signur Aluis Maissen cul tetel poetic « Ina risposta necessaria » drova pilver ina cunterreplica, cunquei ch’igl autur plaida sulettamein da sia verdad construida pil agen diever. EI fa la pareta ch’igl autur seigi buc informaus fetg bein davart il process d’evaluaziun concernent il sustegn dils candidats ni dallas candidatas per la regenza. En quei connex fa ei da basegns da menziunar dus puncts: era ils candidats verd-liberals han survegniu il susteniment dallas associaziuns economicas. Els han denton buca suttascret quei program, cunquei ch’el cunterfar a certs principis da lur vesta da politica. Ils verd-liberals han buca vuliu lur sustegn, cunquei che els vulan restar independents e buca saltar tenor la pipa da certas lobis, e quei mo pervia dad in sustegn finanzial ed ideal. Bugen viel jeu era piarder enqual plaid arisguard la corrupziun, nua ch’igl autur ha giu la garmaschia da disfamar mia persuna e quei cun arguments che maretan buca da vegnir definir sco arguments, silmeins buca en in senn d’ina logica stringenta. Corrupziun vegn definau sco abus d’ina situaziun da confidonza ella politica, administraziun, economia ni giustia per survegnir in avantatg material ni immaterial. Ella scienzia politica vegn corrupziun definida tenor Harold Dwight Lasswell sco igl abus d’in interess general en favur d’in avantatg special. Il causal per quella definiziun ei pli che mo daus. Po denton esser che signur Maissen ei buca orientaus davart la definiziun da corrupziun ni ch’el disfamescha sappientivamein persunas che s’engaschan per ina politica independenta e che ein buca promts da seschar cumprar e manipular da certs lobists.
En connex culla iniziativa d’ina refuorma territoriala emblida signur Maissen da menziunar che quella iniziativa vegn lantschada proxima jamna dalla partida socialdemocratica e verd-liberala ensemen (e buca encunter) cullas associaziuns economicas. Gest quellas associaziuns economicas che sustegnan numerus candidats e candidatas ein era dalla partida, e nuota mo la partida socialdemocratica, sco signur Maissen emprova da far valer. En quei connex semuossa ei puspei che la pcd vul esser per zatgei e sch’ei va per la caussa concreta ein els passivs ni schizun encunter, el tudestg vegn ina tala politica numnada « wischiwaschi ». La partida verd-liberala sustegn e cooperescha fetg bein cullas associaziuns economicas, denton senza seschar cumprar – per els eisi evident e moralicamein inevitabel che politichers restien independents e s’engaschien per la societad e buca per lur atgna buorsa.
Igl ei era bein enconuschent che la Partida cristiandemocratica ha gudiu sin palancau naziunal ils davos onns avon la crisa sustegn finanzial dallas bancas. Gia leu eisi semussau che politichers e partidas cumpradas fan vess da far politica per il pievel (ins patratga mo vida l’entira historia cun las bancas ed ils bonis exorbitants). Sin palancau naziunal ein ils lobists gia daditg ina forza immensa che influenzescha cun bia milliuns il far e demanar da nos politichers. La pcd ed autras partidas el Grischun ein sin buna via da seschar far il medem cun els – cun suttascriver quels puncts han els ussa puspei fatg in pass en quella direcziun. Mintgin sto decider sez sche el ni ella vul eleger tals politicher ni buca – tenor miu meini ha nossa patria, nies Grischun denton meritau politichers libers, politichers che astgan aunc far politica per il beinstar dil pievel e buca mo per quels che han raps.
Simon Casutt, vicepresident Partida verd-liberala dil Grischun, Falera