Allegra!
Avon dus onns havein nus fundau la Partida verd-liberala el Grischun. En quels dus onns eis ei reussiu a nus dad etablir ina forza politica nova, frestga ed independenta. Adina dapli persunas separticipeschen vid la realisaziun da nossa visiun d’in cantun Grischun finanzial, ecologic e social persistent.
Suenter dus onns d’intensiva lavur selegrein nus fetg dallas proximas elecziuns. Bugen purtassen nus nossa visiun e nossas ideas el Cussegl grond. Gest il cumin dalla Foppa, il qual gioga ina rolla impurtonta enteifer la Surselva, duess eleger politichers che s’engaschan cun tutta forza per ils interess locals e regiunals a Cuera. Jeu sundel perschuadius che nossa regiun vegn era ad haver grond potenzial el futur, priu il cass che nus dein avon la dretga via. Persuenter drova ei denton persunas motivadas ed engaschadas ch‘ein promtas da semetter allas sfidas futuras.
Il cumin dalla Foppa sesanfla amiez la Surselva e surpren aschia ina funcziun impurtonta. La situaziun centrala ei problematica e cunvegnenta en ina. Dad ina vart profitescha l’entira regiun da quella funcziun da center, da l’autra vart ei ina gronda part exponida al traffic atras la regiun. Quei porta daners ella regiun, denton era bia traffic. Nossa regiun duess anflar cheu in equiliber persistent. E gest per quei equiliber vegnel jeu a s’engaschar el futur.
Politicamein schai miu focus tier ils puncts suandonts :
- Mobilitad e traffic: Bunas colligiaziuns per trens ed autos da posta
- Energie schubra: Effizienza d’energia e promoziun dallas energias regenerablas (sulegl, aua, lenna)
- Economia: Engrondiment dalla qualitad dil spazi economic ella Foppa e la scarica administrativa per fatschentas pintgas e mesaunas
- Planisaziun da territori: Moda da construcziun concentrada enstagl da destructuraziun, contingentar ni limitar las secundas habitaziuns ; scaffir territori per indigens
- Giuventetgna e scolaziun: Rinforzar la Foppa sco center da scolaziun regiunal (scola da mistregn, scola mercantila, scalem superiur); structuras dil di adequatas; saver cumbinar mistregn e famiglia
- Sport: La regiun da Glion sco center da sport ella Surselva. Glion sco center per giuventetgna e sport per l’entira Surselva.
- Natira: Protecziun digl ambient e dalla cuntrada ; rinforzament dall’agricultura regiunala e biologica
Engaschi politic
- Co-president da fundaziun dalla Partida verd-liberala dil Grischun
- Vicepresident dalla Partida verd-liberala dil Grischun
- Commember dalla suprastonza dalla Partida verd-liberala dalla Svizra
- Commember dalla suprastonza dil CTS Grischun
Scolaziun / mistregn
- Maturitad d’economia bilingua a Cuera
- Studi da scienzia da politica ed economia (senza finiziun)
- Compliance Officer tier ina banca privata el Principadi da Liechtenstein
Sco candidat giuven, dinamic ed engaschaus per il Cussegl grond representel jeu ina politica persistenta ed orientada a sligiaziuns. Susteni era Vus mei cun Vossa vusch e scrivi Simon Casutt silla gliesta per il Cussegl grond el cumin dalla Foppa.
Per damondas ni informaziuns sundel jeu contonschibels sut simon.casutt@grunliberale.ch ni sut 079 798 49 91. Engraziel fetg!
Brev_romontsch
Wahlbrief_deutsch